Unnið er að því að áhöfnin á Polar Nanoq fái áfallahjálp auk þess sem leitað hefur verið aðstoðar hjá Rauða krossi Íslands. Þetta kemur fram í tilkynningu sem Jørgen Fossheim, útgerðarstjóri hjá Polar Seafood, hefur sent fjölmiðlum.
Þar kemur fram að lögergla hafi leitað í skipinu og rætt við aðra skipverja. Enginn þeirra sé grunaður um aðild að hvarfi á Birnu Brjánsdóttur.
Eins og fram hefur komið fundust fíkniefni í skipinu. Jørgen segir að einn skipverji hafi verið handtekinn vegna rannsóknar á því máli. „Togarinn heldur kyrru fyrir í Hafnarfjarðarhöfn á meðan lögreglan lýkur rannsókn sinni um borð.“
Þá segir hann að Polar Seafood muni áfram aðstoða íslensk yfirvöld vegna málanna og vonist til að þau upplýsist sem fyrst. „Þá leggur fyrirtækið sig fram um að koma upplýsingum til ættingja skipverja, auk þess sem unnið er að því að útvega áhöfninni áfallahjálp og leitað hefur verið aðstoðar hjá Rauða krossi Íslands.“
Togarinn Polar Nanoq kom aftur til hafnar í Hafnarfirði um klukkan ellefu í gærkvöldi.
Þrír skipverjar hafa verið handteknir og úrskurðaðir í gæsluvarðhald í tengslum við rannsókn lögreglu á hvarfi Birnu Brjánsdóttur.
Í nótt leitaði lögregla í skipinu og ræddi við aðra skipverja. Enginn þeirra er grunaður um aðild að hvarfi Birnu.
Lögreglan rannsakar að auki fund á umtalsverðu magni á hassi um borð í skipinu. Einn skipverji til viðbótar hefur verið handtekinn í tengslum við rannsókn lögreglu á því máli. Togarinn heldur kyrru fyrir í Hafnarfjarðarhöfn á meðan lögreglan lýkur rannsókn sinni um borð.
Polar Seafood mun áfram aðstoða yfirvöld á Íslandi vegna málanna og vonar að þau upplýsist sem fyrst. Þá leggur fyrirtækið sig fram um að koma upplýsingum til ættingja skipverja, auk þess sem unnið er að því að útvega áhöfninni áfallahjálp og leitað hefur verið aðstoðar hjá Rauða krossi Íslands.
Spurningum vegna rannsóknarinnar er beint til íslensku lögreglunnar.
Jørgen Fossheim, útgerðarstjóri hjá Polar Seafood