Ekkert nýtt hefur komið fram í sambandi við hvarf Birnu Brjánsdóttur sem hefur nú verið saknað í 4 sólarhringa. Laust eftir miðnætti í gærkvöldi fór af stað þrálátur og mjög hávær orðrómur á samfélagsmiðlum um að lík hefði fundist við Hvaleyrarvatn. Orðrómurinn átti ekki við nein rök að styðjast. Björgunarsveitir sem leitað hafa að Birnu eru hættar leitinni. Upplýsingafulltrúi Landsbjargar segir þó að sveitirnar verði í viðbragðsstöðu ef fram koma nýjar vísbendingar í málinu.

Sögusagnir

Grímur Grímsson, stjórnandi rannsóknarinnar á hvarfi Birnu, sagði í samtali við DV í nótt að lögreglu hafi ekki borist nein tilkynning um líkfund. Hvorki í síma neyðarlínunnar 112 né með öðrum hætti. Samt sem áður var tekin ákvörðun um að fara á staðinn.

„Þetta voru sögusagnir sem lögreglan fylgdi í þetta skiptið en það er nú vanalega ekki gert. Við förum ekki nema eftir staðfestum upplýsingum en núna var sú ákvörðun var tekin að kanna málið við Hvaleyrarvatn, sem hefði í raun ekki þurft að gera.“ sagði Grímur í samtali við fréttastofu RÚV nótt.

Mikill múgæsingur greip um sig á samfélagsmiðlum í tengslum við málið í gærkvöldi og í nótt. Grímur benir á að það geti að vissu leyti verið skiljanlegt þar sem fólk er hrætt og það hafi miklar áhyggjur af málinu.

Enginn handtekinn

Þá greindi RÚV frá því laust eftir miðnætti að enginn hafi verið handtekinn um borð í skipinu Polar Nanuq og enginn hafi verið yfirheyrður með stöðu grunaðs manns. Þetta var haft eftir Grími Grímssyni, sem stjórnar rannsókn málsins.

Skömmu áður fullyrti Kvennablaðið að í það minnsta tveir áhafnarmeðlimir hafi verið handteknir. Fréttin var uppfærð skömmu eftir að Grímur sagði engan grunaðan í málinu. Þá sagði í viðbót við frétt Kvennablaðsins

„Tæknilega gæti verið að mennirnir séu enn ekki með réttarstöðu grunaðra og ef það er tilfellið þá er auðvitað ekki um eiginlega handtöku að ræða, eins og fyrirsögn Kvennablaðsins gaf til kynna nú laust fyrir miðnætti, heldur yfirheyrslu yfir mönnunum og þess vegna er verið að fara með þá með skipi til lands.“

Kvennablaðið fullyrti einnig að Birna hafi verið í samskiptum við áhafnarmeðlim á TInder kvöldið sem hún týndist en engin staðfesting hefur þó fengist á því.

Fréttablaðið greinir frá því í morgun að forsvarsmenn Polar Seafood, fyrirtækisins sem á grænlenska togarann Polar Nanoq, hafi sjálfir tekið ákvörðun í gærkvöldi um að snúa skipinu við og sigla aftur til Íslands.
Þá segir að skipverjar séu hissa og ringlaðir vegna frétta frá Íslandi og þótt undarlegt að ekki hafi verið haft samband við þá frá danska herskipinu Triton, sem fjölmiðlar greindu frá í gær að sigldu til móts við skipið.