Lýðveldið Palau í Vestur-Kyrrahafi er klasi lítilla eyja sem ekki eru beint á allra vörum frá degi til dags. Eyjarnar eru þó margrómaðar fyrir stórbrotna náttúru og mikla veðursæld.
Á undanförnum árum hefur ágangur ferðamanna aukist frá ári til árs og til að stemma stigu við auknum átroðningi ferðamanna hyggst forsetinn, Tommy Remengesau, grípa til þess ráðs að breyta lögum á þann veg að aðeins yrði heimiluð bygging fimm stjörnu lúxushótela á eyjunum.
Breska blaðið Telegraph greinir frá þessu en yrðu þessi nýju lög að veruleika þyrftu hóteleigendur að uppfylla allskonar skilyrði til hótelreksturs. Yfirvöld telja að þetta myndi gera það að verkum að fjöldi ferðamanna myndi minnka en að sama skapi myndu tekjurnar standa í stað, eða því sem næst, auk þeirra jákvæðu áhrifa sem minni fjöldi fólks myndi hafa á náttúruna.
Palau samanstendur af um 250 eyjum og segir Tommy að þessi aukna ásókn erlendra ferðamanna stefni eyjunum í ákveðna hættu. Á undanförnum árum hefur til dæmis fjöldi kínverskra ferðamanna margfaldast en margar ferðaskrifstofur í Kína hafa boðið upp á ódýrar pakkaferðir til Palau.