Það er einsdæmi og jafnfram gleðilegt að í síðustu viku voru engin hegningarlagabrot á borðum lögreglu á Suðurlandi. Þetta kemur fram í tilkynningu frá embættinu.

Þá er greint frá því í tilkynningunn að húsleit hafi verið gerð í íbúð á Höfn um helgina. Tveir karlmenn voru handteknir eftir að hvítt duft fannst í íbúðinni. Mennirnir sögðu það vera fæðubótarefni. Að auki var hald lagt á nokkuð af sveppum.

Eftir yfirheyrslu voru mennirnir látnir lausir. Efnið og sveppir verða sendir í efnarannsókn og niðurstaða úr henni mun skera úr um framhald málsins.

Síðastliðinn þriðjudag kom upp eldur í óskráðri bifreið í sandgryfju skammt frá Ölfusréttum. Þegar slökkvilið Brunavarna Árnessýslu kom á vettvang var bifreiðin alelda. Bifreiðin var gömul fólksbifreið sem ekki var í umferð. Tveir unglingar höfðu verið að keyra bifreiðina í sandgryfjunni þegar eldur kom upp í mælaborði.