Talinn hafa ellefu mannslíf á samviskunni
Raðmorðingi sem talinn er hafa ellefu mannslíf á samviskunni er loksins kominn á bak við lás og slá, tæpum 30 árum eftir að hann lét fyrst til skarar skríða.
Maðurinn sem um ræðir heitir Gao Chengyong og er búsettur í Kína. Hann er talinn bera ábyrgð á morðum á ellefu konum á árunum 1988 til 2002. Öllum konunum hafði verið nauðgað og leiddi DNA-rannsókn í ljós að sami maðurinn bæri ábyrgð á ódæðisverkunum.
Maðurinn var handtekinn eftir að náinn ættingi hans var handtekinn vegna annars máls, alls ótengdu morðunum ellefu. Lögregla tók DNA-sýni úr frændanum og eftir að hafa sett niðurstöðurnar í þar til gerðan gagnagrunn yfirvalda kom í ljós að erfðaefni mannanna tveggja voru svipuð.
Að því er breska ríkisútvarpið, BBC, greinir frá hefur Gao játað á sig morðin, en hann var handtekinn í Gansu-héraði þar sem hann hefur rekið litla verslun. Morðin sem um ræðir voru framin í Gansu-héraði og í Innri-Mongólíu.
Morðin vöktu mikinn óhug meðal íbúa á sínum tíma og hlaut raðmorðinginn meðal annars viðurnefnið Kobbi kviðrista (e. Jack the Ripper), sem er vísun í einn þekktasta raðmorðingja allra tíma. Líkt og í tilfelli Kobba voru fórnarlömbin öll konur, búið var að sundurlima sum fórnarlömbin og fjarlægja úr þeim líffæri.