Julio Macias Gonzales, 17 ára piltur frá Mexíkóborg, lést í síðustu viku, og er dánarorsök talin vera blóðtappi í heila sem átti rætur að rekja til sogbletts á hálsi hans.
Talið er að sogbletturinn hafi verið verk 24 ára kærustu drengsins.
Julio var staddur á heimili sínu í Iztapalapa hverfinu, þegar hann fékk öflugan krampa. Ættingjar hans hringdu á sjúkrabíl, en ekki reyndist unnt að bjarga lífi Julios. Við læknisskoðun kom í ljós að sogbletturinn á hálsi hans hafði líklega orsakað blóðtappa sem ferðaðist upp í heila og olli þar heilablóðfalli.
Foreldrar Julio hafa tjáð sig um að þeim hugnaðist ekki samband sonarins við hina mun eldri konu. Ekki er vitað hvar hún heldur sig í dag.
Þetta er ekki fyrsti hættulegi sogbletturinn sem vitað er um. Árið 2011 hlaut 44 ára gömul kona lömun í vinstri handlegg eftir lítið heilablóðfall. Talið er að orsökin hafi verið sogblettur hægra megin á hálsi hennar. Meðferðin fólst í segalosandi meðferð, og blóðtappinn hvarf innan fárra daga.