Borgarstjóri þakkar hagræðingu og auknum skatttekjum
Rekstur A-hluta Reykjavíkurborgar var jákvæður um 490 milljónir króna á fyrstu sex mánuðum ársins. Í tilkynningu borgarinnar segir að hagræðingarvinna og hærri skatttekjur hafi skilað árangri. Áformað hafi verið að ná fram 604 milljóna hagræðingu á fyrri hluta ársins en hún hafi endað í 611 milljónum króna.
Innan A-hluta er hinn almenni rekstur borgarinnar sem er fjármagnaður með skatttekjum. Samkvæmt áætlun borgarinnar átti hún að skila 300 milljóna króna tapi á tímabilinu. Skatttekjur voru 554 milljónum hærri en áætlun gerði ráð fyrir.
„Það er ánægjulegt að sjá að sú hagræðingarvinna sem við lögðum í er að skila sér. Þá er líka gott að sjá að tekjur Reykvíkinga eru að aukast því það sýna hærri skatttekjur borgarinnar. Hins vegar verðum við að halda þétt um taumana því það má lítið út af bera í rekstrinum,“ segir Dagur B. Eggertsson borgarstjóri í tilkynningunni.
Rekstrarniðurstaða samstæðu Reykjavíkurborgar, A- og B-hluta, var jákvæð um 10.561 milljón en áætlanir gerðu ráð fyrir jákvæðri niðurstöðu upp á 5.300 milljónir. Til B-hluta teljast fjárhagslega sjálfstæð fyrirtæki sem eru að hálfu eða meirihluta í eigu borgarinnar.