Dýraverndunarsamband Íslands vill að Matvælastofnun (MAST) geti fellt niður opinberar greiðslur í landbúnaði vegna brota er kemur að velferð dýr en ákvæðið var tekið út úr samningnum árið 2013. Bændasamtök Íslands og Landssamband kúabænda lögðust gegn ákvæðinu.

Skiptu um skoðun

Nú hafa stjórnir félaganna þó skipt um skoðun og eru jákvæð fyrir því að ákvæðið verði sett aftur inn í samningana. Í dag eru reglurnar þær að ef að bóndi misþyrmir dýri með þeim afleiðingum að það drepst þá fær hann 300 til 400 þúsund í stjórnvaldssekt en hann má þó enn halda skepnur.

Í Fréttablaðinu í dag er greint frá því að Dýraverndunarsamband Ísland hafi í harðorðri umsög um búvörusamninga sagt það ótækt með öllu að ríkið styrki fjárhagslega í gegnum búvörusamninga aðila sem uppvísir eru að lögbrotum eins og alvarlegu dýraníði.

Lítið eftirlit

Sambandið skorar á Alþingi að sjá til þess að heimild til að fella niður opinbera styrki vegna alvarlegs eða ítrekaðs dýraníðs verði felld inn í nýja búvörusamninga og búvörulög.

„Ég fæ ekki betur séð en að hið opinbera veiti ekki nægt fé til eftirlits með dýraníði hér á landi. Íslenskir neytendur vilja ekki að skattfé renni til einstaklinga sem uppvísir eru að hrottalegu dýraníði og því þarf Matvælastofnun að búa yfir úrræði til að stöðva svoleiðis voðaverk,“ segir Hallgerður Hauksdóttir, formaður Dýraverndunarsambands Íslands um málið.