Illugi Gunnarsson, mennta- og menningarmálaráðherra, hefur ákveðið að ganga til samninga við Háskólann á Akureyri vegna kennslu- og rannsóknarstarfsemi á sviði lögreglufræða. Ákveðið var að fela Ríkiskaupum að annast auglýsingu um val á framkvæmdaraðila og halda utan um matsferlið.

Þetta kemur fram á vef mennta- og menningarmálaráðuneytisins.

Fjórir skólar skiluðu inn þátttökutilkynningu vegna valsins; Háskóli Íslands, Háskólinn á Akureyri, Háskólinn á Bifröst og Háskólinn í Reykjavík. Umsókn Háskólans á Bifröst uppfyllti ekki hæfiskröfu um viðurkenningu til kennslu í sálfræði.

Þann 20. júlí síðastliðin var skipuð matsnefnd um lögreglunám á háskólastigi sem fékk það hlutverk að fara yfir innsend gögn. Niðurstaða matsnefndar var að þrír umsækjendur væru hæfir til að taka við kennslu- og rannsóknarstarfsemi á sviði lögreglufræða. Innbyrðis skipting stigafjölda þeirra umsækjenda sem uppfylltu lágmarksskilyrði var eftirfarandi:

Háskóli Íslands 128 stig af 135
Háskólinn á Akureyri 116 stig af 135
Háskólinn í Reykjavík 110 stig af 135

Sem áður segir var ákveðið að ganga til samninga við Háskólann á Akureyri um kennslu- og rannsóknarstarfsemi á sviði lögreglufræða. Að því er fram kemur á vef ráðuneytisins var það mat ráðherra að Háskólinn á Akureyri hafi uppfyllt mjög vel þær kröfur sem gerðar eru um gæði náms og aðbúnað til lögreglumenntunar. Þá telji ráðherra aðstæður við HA til þess fallnar að gera nemendum af landinu öllu kleift að leggja stund á lögreglunám. Að auki sé með þessari ákvörðun skotið styrkari stoðum undir fjölbreytta starfsemi Háskólans á Akureyri.