Ung kona telur að sér hafi verið byrluð ólyfjan á skemmtistað í miðborg Reykjavíkur aðfaranótt sunnudags. Konan var á ferð með vinum sínum og hafði drukkið hóflega þegar farið var á umræddan stað. Eftir að hafa drukkið hálft hvítvínsglas þar inni féll konan í gólfið og man lítið sem ekkert þar til hún vaknaði heima hjá sér daginn eftir.

Fjallað er um þetta í Morgunblaðinu í dag.

Lögregla var kölluð á staðinn ásamt sjúkrabíl og kom ítrekað fram í máli konunnar og vinkonu hennar að henni hafi verið byrluð ólyfjan. Þrátt fyrir það var hún hvött til að fara heim í leigubíl. Kristján Ingi Kristjánsson hjá kynferðisbrotadeild lögreglunnar á höfuðborgarsvæðinu segir að það hefði átt að senda konuna á bráðamóttöku til blóð- og þvagsýnatöku.

Ef stúlkan hefði verið send á bráðamóttökuna hefði málið ratað inn á borð rannsóknardeildar lögreglunnar. Kristján segist hvetja fólk, sem telur að sér hafi verið byrluð ólyfjan, að fara á bráðamóttöku.

Eftir að konan féll í gólfið fór hún inn á salerni staðarins þar sem hún kastaði upp í um tuttugu mínútur. Konan var orðin köld og skalf mikið þegar þarna var komið við sögu. Hún átti mjög erfitt með að tjá sig þó augu hennar hafi verið opin. Konan kveðst í viðtalinu í Morgunblaðinu vilja hvetja fólk til að leita á bráðamóttöku, vakni grunur um að efnum hafi verið laumað í drykki. Þá hvetur hún fólk til að vera á varðbergi og hafa augun á glösum sem drukkið er úr.