„Ég þurfti endilega að vinna þetta og fara þarna út,“ segir Steinar Jónsson hlæjandi en hann tók þátt í heimsmeistaramótinu í diskódansi í Lundúnum árið 1979. Myndband frá úrslitakvöldi keppninnar fyrir hartnær 37 árum hefur slegið í rækilega í gegn eftir að það komst í umferð á facebook fyrr í mánuðinum og var það fyrir tilviljun að myndbandið rak á fjörur sonar Steinars, útvarpsmannsins Atla Más.

Veftímaritið Hint Fashion Magazine deilir umræddu myndskeiði á fésbókarsíðu sinni þann 18.júlí síðastliðinn og þegar rúmar tvær mínútur eru liðnar má sjá keppanda stíga á svið sem kynntur er sem hinn 22 ára gamli Steinar Jónsson.

Sýnir hann listir sínar á dansgólfinu við mikinn fögnuð en eftir að myndskeiðið komst í dreifingu meðal íslenskra facebook notenda hafa margir hverjir spurt sig hver hinn lipri dansari sé.

Í samtali við Nútímann segir Steinar að hann hafi fyrir rælni tekið þátt í undankeppni fyrir heimsmeistaramótið en hún fór fram á skemmtistaðnum Óðali. Vinir hans náðu einhvern veginn að telja hann inn á að taka þátt.

„Það endaði á því að ég tek þátt, og það endaði með þessum ósköpum. Ég þurfti endilega að vinna þetta og fara þarna út,“ segir hann hlæjandi.

Atli Már uppgvötvaði myndbandið þegar vinur hans sendi honum það og spurði hvort að um pabba væri að ræða.
„Svo bara kemur pabbi allt í einu hoppandi í einhverjum diskógalla og ég held að ég hafi aldrei verið jafn hissa á ævinni. Ég skyldi ekkert hvað var í gangi,“ segir hann en myndbandið stórskemmtilega, sem fengið hefur milljónir áhorfa, má finna hér fyrir neðan.