Tólf eru slasaðir, þar af þrír alvarlega, eftir að tuttugu og sjö ára karlmaður sprengdi sig í loft upp í bænum Ansbach í Þýskalandi í gærkvöldi. Maðurinn er sagður hafa verið frá Sýrlandi og mun hann hafa sótt um hæli í Þýskalandi fyrir um ári en verið synjað.

Atvikið átti sér stað um klukkan 22 að staðartíma, skammt frá svæði í bænum þar sem tónlistarhátíð fór fram. Maðurinn hafði reynt að komast inn á tónleikasvæðið en þurfti frá að hverfa þar sem hann var ekki með miða. Þess í stað gekk maðurinn inn á bar í bænum þar sem sprengjan sprakk. Maðurinn lést og tólf særðust.

Þetta er þriðja árásin í Þýskalandi á skömmum tíma en áður hafði byssumaður skotið fjölda fólks til bana í borginni Munchen. Þá réðst maður vopnaður öxi á fólk í lest í síðustu viku.

Maðurinn er sagður hafa verið sýrlenskur hælisleitandi og sótti hann um hæli í Þýskalandi fyrir um ári. Honum var synjað en veitt leyfi til að dvelja tímabundið í Þýskalandi í ljósi ástandsins í Sýrlandi þar sem borgarastyrjöld hefur ríkt.

Maðurinn hafði komist í kast við lögin í Þýskalandi, meðal annars vegna fíkniefnalagabrota. Þá er maðurinn sagður hafa reynt í tvígang að svipta sig lífi áður en að atvikinu í gærkvöldi kom.

Joachim Herrmann, innanríkisráðherra Bæjaralands, sagði við fréttamenn eftir voðaverkið í gærkvöldi að hann gæti ekki útilokað það að maðurinn hefði tengsl við Íslamska ríkið, ISIS. Tók hann þó fram að engar sannanir væru fyrir hendi um tengsl mannsins við hryðjuverkasamtökin.

Maðurinn var búsettur í Ansbach og í morgun sáust lögreglumenn fara inn á hótel í borginni þar sem maðurinn er talinn hafa dvalið. Ekki hefur verið greint frá nafni mannsins.