Lögreglan á Suðurnesjum stöðvaði rétt fyrir hádegi för ökumanns með því að aka inn í hlið bifreiðar hans. Ökumaðurinn mun hafa óhlýðnast tilmælum lögreglu um að stöðva aksturinn, en ungt barn var farþegi í bílnum.
RÚV greinir frá að lögreglan hafi fyrr í dag stöðvað bíl mannsins við Kjarnabraut í íbúahverfi í Reykjanesbæ. Þar er hámarksökuhraði 30 kílómetrar á klukkustund.
Samkvæmt frétt Stundarinnar hafði lögreglan veitt manninum eftirför áður en keyrt var í hlið bifreiðinnar til að stöðva hana og var maðurinn í kjölfarið handtekinn.
Maðurinn mun vera góðkunningi lögreglunnar en lögreglan á Suðurnesjum verst allra frétta af málinu.