Lögreglan á höfuðborgarsvæðinu sinnti fjölmörgum verkefnum í gærkvöldi og í nótt. Rétt eftir klukkan eitt eftir miðnætti var bifreið stöðvuð við Grandagarð þar sem tveir farþegar voru að hluta til út úr bifreiðinni og því ekki í öryggisbelti.

Í dagbók lögreglunnar kemur fram að farþegarnir hafi setið í gluggafalsi hurða á meðan bifreiðinni var ekið áfram. Annar farþeginn reyndist vera 16 ára gamall og var málið því tilkynnt til Barnaverndar.

Fyrr um kvöldið hafði lögregla handtekið par sem grunur lék á að hefði valdið umferðaróhappi. Fólkið var auk þess grunað um akstur undir áhrifum fíkniefna og vörslu fíkniefna. Upp úr klukkan níu í gærkvöldi var maður í annarlegu ástandi handtekinn á slysadeild þar sem hann hafði verið til vandræða. Maðurinn var vistaður í fangageymslu lögreglu meðan ástand hans lagast.

Um klukkan þrjú í nótt var tilkynnt um eld í bifreið við Vogaskóla, en bifreiðin er talin ónýt eftir eldsvoðann. Eldsupptök eru ókunn.

Loks var bifreið stöðvuð við N1 í Ártúnsholti og var ökumaðurinn, 17 ára stúlka, grunuð um akstur undir áhrifum fíkniefna og vörslu fíkniefna. Málið var tilkynnt til Barnaverndar.