Hinn 61 árs gamli John Edwards er fyrrum eiturlyfjafíkill sem bjó á götunni í 20 ár en hann undirbýr nú vægast sagt óvenjulegan gjörning. Í kvöld ætlar hann að streyma frá sinni eigin „jarðarför“ á samskiptamiðlinum Facebook og getur áhugafólk um víða veröld fylgst með.

Óhætt er að segja að John hafi lifað skrautlegu lífi í gegnum ævina. Hann ánetjaðist snemma áfengi og fíkniefnum og bjó í rúm 20 ár á götunni. Þar mátti hann meðal annars þola grófar misþyrmingar og kveðst hann hafa glímt við tíðar sjálfsvígshugsanir. Þá þurfti að horfa á eftir ótal vinum sínum úr neyslunni hverfa ofan í gröf.

Honum tókst að snúa við blaðinu fyrir 23 árum og hefur síðan þá, ásamt góðgerðarsamtökunum Walking Free, einbeitt sér að því að hjálpa öðrum sem villst hafa af leið.

Edwards er ekki í sjálfsmorðshugleiðingum þó svo hann hyggist leggjast undir græna torfu seinna í dag heldur hyggst hann með þessu uppátæki vekja fólk til umhugsunar um þau fjölmörgu dauðsföll tengd fíkniefnaneyslu sem eiga sér stað ár hvert. Kveðst hann hafa farið í svo margar jarðarfarir í gegnum ævina að hann sjái sig knúinn til þess að ná til þeirra sem eru í sjálfsvígshugleiðingum.

Beina útsendingin frá „útför“ John mun hefjast í kvöld um átta leytið að breskum tíma og mun hann notast við snjallsíma og GoPro myndavél við upptökuna, auk þess sem hann hefur meðferðis súrefnisslöngu og ferðaklósett, auk matar og vatns sem hann mun fá í gegnum slöngu.

Alls hyggst hann dvelja í gröfinni í þrjá daga en hægt er að fylgjast með gjörningum á Facebook síðu hans semog á heimasíðu samtakanna Walking Free.