Verkefni lögreglunnar í gærkvöldi voru af ýmsum toga
Lögreglan á höfuðborgarsvæðinu handtók karlmann á heimili sínu um hálf tólf leytið í gærkvöldi sem grunaður er um framleiðslu fíkniefna. Í dagbók lögreglu kemur fram maðurinn hafi verið vistaður í fangageymslu meðan málið er í rannsókn.
Fleiri mál komu inn á borð lögreglu í gærkvöldi og í nótt. Um hálf átta leytið í gærkvöldi var maður handtekinn við veitingahús í miðborginni en hann er grunaður um líkamsárás. Hann fór ekki að fyrirmælum lögreglu og var hann vistaður í fangageymslu í kjölfarið.
Um klukkan 21.20 var bifreið stöðvuð á Bústaðavegi og er ökumaðurinn grunaður um akstur undir áhrifum fíkniefna. Hann var látinn laus að lokinni upplýsinga- og sýnatöku. Að sögn lögreglu var farþegi í bifreiðinni kærður fyrir vörslu fíkniefna.
Þá var tilkynnt um bifreið sem hafði verið ekið á ljósastaur við Mjóddina um hálf átta leytið í gærövldi. Bifreiðinni var síðan ekið burt af vettvangi en lögregla hafði afskipti af ökumanni bifreiðinnar skömmu síðar. Orkuveitunni var tilkynnt um staurinn sem skemmdist nokkuð.