Bombardier flugvélar Flugfélags Íslands munu skarta nöfnum þekktra kvenskörunga frá fyrstu árum Íslandsbyggðar. Þetta var tilkynnt við hátíðlega athöfn á Reykjavíkurflugvelli í dag þegar nafn fyrstu flugvélarinnar var afhjúpað.

Efnt var til nafnasamkeppni meðal almennings í tilefni af komu flugvélanna hingað til lands og bárust tæplega 6.000 tillögur. Sérstök dómnefnd var skipuð til að fara yfir tillögurnar og eftir mikla yfirlegu og vangaveltur var ákveðið að verðlauna tillögu um að nefna fyrstu fimm vélarnar eftir þekktum kvenskörungum frá fyrstu árum Íslandsbyggðar.

„Þátttakan fór fram úr björtustu vonum okkar og ég er sannfærður um að verðlaunatillagan á eftir að falla vel í kramið bæði hjá Íslendingum sem og erlendum ferðamönnum. Vinningshafinn fær að launum flug fyrir tvo til Ilulissat á Grænlandi ásamt gistingu í tvær nætur og er andvirði ferðarinnar hátt í 250.000 krónur,“ segir Árni Gunnarsson, framkvæmdastjóri Flugfélags Íslands.

Það var Ólafía Þ. Stefánsdóttir sem sendi inn tillöguna sem varð fyrir valinu. Ólafía býr á Seyðisfirði, og flaug í boði Flugfélagsins til Reykjavíkur.

Við hátíðlega athöfn á Reykjavíkurflugvelli var nafn fyrstu vélarinnar svo afhjúpað, en það er Auður djúpúðga, líklega frægasta landnámskonan, sem þótti afbragð annarra kvenna, útsjónarsöm og djúpvitur. Hin fjögur nöfnin sem aðrar flugvélar Flugfélags Íslands munu skarta eru Arndís auðga, sem nam land í Hrútafirði, Hallgerður langbrók, frægasta kvenhetja Íslandssögunnar, Þuríður sundafyllir sem nam land í Bolungavík og Þórunn hyrna, sem nam land í Eyjafirði ásamt manni sínum Helga magra.