Auraráð, samtök áhugamanna um Auroracoin á Íslandi opnaði í dag markað fyrir skipti á íslenskum krónum og Auroracoin. Um er að ræða Kauphöllina ISX.

Á vefsvæði Kauphallarinnar er hægt að millifæra Auroracoin inn og út af íslenskum bankareikningum. Hópur fólks sem tók yfir Auroracoin af huldumanninum sem hannaði myntina hefur staðið að þróun Kauphallarinnar. Enn fremur er greint frá því á vefsíðunni að þetta sé í fyrsta skipti þar sem boðið er upp á að skipta út rafmynt fyrir íslenskar krónur.

Viðskiptablaðið greindi frá því í gær í viðtali við Pétur Árnason, stjórnarformaður Auraráðs, að auðvelt væri að kaupa Auroracoin. Að hans sögn þurfi aðeins að skrá sig inn á svæðið, sem hægt sé að gera með Íslykli frá Þjóðskrá. Svo þegar það þurfi að millifæra, skuli setja inn tilvísunarnúmer og millifæra á uppgefinn bankareikning.

Kauphöllin er á vefslóðinni isx.is