Tíu milljónir króna hafa safnast
Hjón í Alabama í Bandaríkjunum og foreldrar samtals sex barna dóu með aðeins tveggja daga millibili fyrir skemmstu. Sett hefur verið á fót söfnunarsíða til að aðstoða börnin, sem eru á aldrinum 6 til 20 ára, á þessum erfiðu tímum.
Að sögn aðstandenda lést móðirin, Jennifer Norsworthy, fyrir um viku síðan. Talið er að hún hafi fengið blóðtappa og var hún úrskurðuð látin við komuna á sjúkrahús. Innan við 48 klukkustundum síðar lést eiginmaður hennar, Toby Norsworthy, eftir að hafa fengið hjartaáfall í svefni. Hann var úrskurðaður látinn við komuna á sjúkrahús, af sama lækni og úrskurðaði eiginkonu hans látna.
Toby og Jennifer höfðu verið saman í þrettán ár og áttu þau þrjú börn saman, en auk þess átti Jenny þrjú börn úr fyrra sambandi.
Sem fyrr segir var söfnunarsíðu komið á fót á vefnum GoFundMe og þegar þetta er skrifað hafa tæplega 80 þúsund dalir safnast, tæpar tíu milljónir króna.