Ekkert áætlunarflug verður um Keflavíkurflugvöll frá klukkan tvö í nótt og fram til klukkan sjö í fyrramálið vegna yfirvinnubanns flugumferðarstjóra.

Þetta segir í tilkynningu frá Isavia. Þar kemur jafnframt fram að á þessu tímabili hafi 20 vélar átt að koma frá Norður-Ameríku og sjö vélar að leggja af stað til Evrópu.

Undantekning verður þó gerð fyrir sjúkra-og neyðarflug. Flugumferðin raskast sökum þess að tveir flugumferðarstjórar, sem áttu að vera á vakt í nótt, eru veikir.

Ekki fást aðrir í þeirra stað vegna þess að yfirvinnubann hefur verið sett á flugumferðarstjóra á Keflavíkurflugvelli. Þess vegna þarf að fella niður, og eða færa til, áætlunarflug í nótt.