30 ár liðin frá alvarlegasta kjarnorkuslysi sögunnar – Fáir búa í annars yfirgefnum bæjum
Þann 26. apríl árið 1986 átti sér líklega stað versta kjarnorkuslys sögunnar. Slysið varð í kjarnorkuveri í Pripyat í Úkraínu, sem þá var hluti af Sovétríkjunum sálugu. Sprengingar urðu í einum ofni í Tsjernobyl-kjarnorkuverinu sem olli því að gríðarmikið magn geislavirkra efna slapp út í andrúmsloftið og dreifðist víða um vesturhluta þáverandi Sovétríkja og Evrópu. Allir íbúar í 30 kílómetra radíus frá verinu voru fluttir á brott á fyrstu dögunum eftir slysið – allt að 135 þúsund manns. Þegar frá leið voru fleiri fluttir á brott, af mun stærra svæði.
Tveir verkamenn létust við sprengingarnar en 28 slökkviliðs- og björgunarmenn létu lífið fyrstu þrjá mánuðina eftir að hafa unnið á vettvangi.
Síðan eru liðin 30 ár. Lífið í kring um Tsjernobyl – þar sem 12–15 þúsund manns bjuggu – er enn ekki samt. Enn þann dag í dag eru fáir íbúar búsettir í bæjunum í kring. Stærstur hluti landsvæðisins hefur með tímanum verið nýttur til ræktunar. Gróður- og dýraríkið dafnar ágætlega og nálægasti sveitabær er í 37 kílómetra fjarlægð frá kjarnorkuverinu, skammt utan svæðisins þar sem takmarkanir hafa verið á aðgengi. Á umræddu býli eru ríflega 260 hestar og einar 55 kýr, sem ræktaðar eru til sölu. Starfsmenn verndarsvæðisins, í 30 kílómetra radíus umhverfis kjarnorkuverið, segja að náið sé fylgst með geislun á svæðinu. Meðfylgjandi myndir tóku Sergey Dolzhenko og Tatyana Zenkovich fyrir myndveituna EPA.