Eiríkur Jónsson sem ritstýrt hefur Séð og heyrt síðustu ár mun fljótlega stíga upp úr ritstjórastólnum. Frá þessu greinir Vísir.
Þar segir að þetta hafi gerst með skömmum fyrirvara og segir í frétt Vísis að Hreins Loftsson. lögfræðingur og eigandi Birtings, hafi viljað að Eiríkur lokaði vefsíðunni Eirikurjonsson.is. Því á Eiríkur að hafa neitað og starfslok því framundan hjá hinum reynda en umdeilda ritstjóra.
Eiríkur var ritstjóri Séð og heyrt á árunum 2007 til 2010. Þegar hann var fyrst ráðinn ritstjóri blaðsins sagði Eiríkur í samtali við DV:
,,Blaðið er mjög sérstakt. Þetta er myndablað, þetta er fréttablað og þetta er blað sem er með mjög sérstaka framsetningu. Þegar best tekst til er Séð og heyrt í mínum huga hrein myndlist.“ Þá bætti hann við á öðrum stað: „Séð og heyrt fjallar um fólk, brosandi fólk sem getur stundum grátið líka.“
Eiríkur greindi frá því að hann hefði breytt áherslum þegar hann tók við blaðinu aftur sumarið 2014.
,, … hætti að stíla upp á krúttkynslóðina og yngra fólk sem lifir fjölmiðlalífi sínu í gegnum síma og tölvur og kaupir ekki tímariti en einbeitti sér þess í stað að miðaldra lesendum og eldra fólki í efnisvali og framsetningu – og árangurinn lét ekki á sér standa.”