Það var ekki afbrot þegar 17 ára unglingur notafærði sér meðvitundarlausa 16 ára stúlku til munnmaka. Svo var alla vega niðurstaða dómara sem taldi að ekki væri um lögbrot að ræða í þessu tilfelli þrátt fyrir að fórnarlambið hafi ekki getað borið neinum vörnum við vegna meðvitundarleysis vegna áfengisneyslu.
Það var dómari í Oklahoma í Bandaríkjunum sem komst að þessari niðurstöður. Í dómsniðurstöðunni kemur fram að munnmök séu ekki tilgreind í þeim lögum í Oklahoma sem vernda fórnarlömb fyrir nauðgun í leggöng eða endaþarm ef fórnarlömbin voru undir áhrifum áfengis eða meðvitundarlaus vegna áfengisneyslu þegar brotið átti sér stað. Hefur dómurinn vakið mikla reiði og hneykslan sem eðlilegt er.
Danska ríkisútvarpið segir að í dómsniðurstöðunni komi fram að ekki sé hægt að tala um að einhver sé neyddur til munnmaka þegar fórnarlambið er undir svo miklum áfengisáhrifum að það er meðvitundarlaust þegar brotið á sér stað. Einnig kemur fram að samkvæmt lögum sé margt tilgreint sem geti gert munnmök að nauðgun en ekki sé tekið fram að meðvitundarleysi vegna áfengisneyslu sé eitt þessara atriða.
Dómurinn hefur orðið til þess að sérfræðingar krefjast endurskoðunar og uppfærslu á löggjöf ríkisins í þessum málaflokki því lögin séu gamaldags og úrelt.
Í stuttu máli voru málavextir umrædds máls þessir: Ungi maðurinn ók stúlkunni heim en þau höfðu verið að drekka áfengi með vinum sínum. Vitni sögðu stúlkuna hafa verið svo ölvaða að það þurfti að bera hana inn í bíl mannsins. Þegar heim var komið var hún enn meðvitundarlaus og fór fjölskylda hennar með hana á slysadeild vegna þessa.
Við rannsókn á sjúkrahúsinu fannst DNA úr unga manninum við munn stúlkunnar og á aftanverðum lærum hennar. Ungi maðurinn sagði að stúlkan hafi veitt honum munnmök með hennar samþykki. Hún sagðist ekki muna neitt eftir atburðarásinni eða nokkru öðru eftir að þau yfirgáfu vini sína.