Fyrsti miðinn settur á bifreið fyrir utan Smáralind í gær – „Með miðunum er hægt að láta fólk vita af mistökunum með smá gríni í leiðinni“
„Gastu lagt svona hjálparlaust? Þú, bíll og bílastæði, ertu viss um að það sé góð uppskrift? Prufaðu að leggja þversum næst, þá gætir þú náð þremur stæðum! Vonandi ertu ekki jafn slæm/ur í rúminu og að leggja í stæði!“
Þetta eru skilaboðin sem Egill Róbertsson sendir ökumönnum sem leggja bifreiðum sínum í fleiri en eitt bílstæði. Egill hefur nú útbúið miða með þessum skilaboðum og er þegar farinn að dreifa miðum til þeirra sem hann telur að eigi þá skilið.
„Ég hafði verið með þessa hugmynd í kollinum síðasta árið. Fyrir skemmstu lét ég svo verða af því og lét prenta nokkur eintök fyrir mig í prentsmiðju. Ég plasta svo miðanna svo að hægt sé að lesa skilaboðin báðu megin,“ segir Egill í samtali við DV.
Fyrsti miðinn fór í umferð í gær. Egill lét hann á bifreið sem lagt var á bílastæðinu fyrir utan Smáralind en ökumaður bifreiðarinnar hafði lagt í tvö stæði. Egill birti í kjölfarið mynd á Facebook-síðunni „Verst lagði bíllinn“ og vakti athæfi hans strax talsverða athygli.
„Fólk er oft að pirra sig á svona löguðu og margir tala um að rispa bíla eða ata hundaskít á hurðarhúna. Það er eitthvað sem fólk á ekki að gera að mínu mati. Með miðunum er hægt að láta fólk vita af mistökunum með smá gríni í leiðinni,“ segir Egill.
Egill vonar að hugmynd hans nái fótfestu og að fleiri fari að nota miðana.
„Fyrir þá sem eru oft að pirra sig á þessu gæti verið gott að eiga nokkra miða í hanskahólfinu.“
Egill hefur látið prenta fjölda miða og hafa nú þegar nokkrir haft samband við hann til að spyrjast fyrir um miðana.