Ævintýraleg tilþrif í troðslukeppni NBA – Þetta á ekki að vera hægt
Hinn árlegi stjörnuleikur NBA-deildarinnar í körfubolta verður leikinn í kvöld, en hátíðin hófst í gær með þriggja stiga skotkeppni og troðslukeppni. Ævintýraleg tilþrif sáust í troðslukeppninni í nótt sem var að sögn fjölmiðla vestanhafs sú besta í mörg ár.
Troðslukeppnin var einvígi á milli ríkjandi meistara, Zach LaVine hjá Minnesota Timerwolves, og Aaron Gordon hjá Orlando Magic. Það þurfti bráðabana til að krýna meistara og á endanum var það sá fyrrnefndi sem fór með sigur af hólmi. Hann fékk fullt hús stiga fyrir lokatroðsluna sína og viðurkenndi hann eftir keppnina að hann hafði aldrei reynt þessa troðslu áður. Hann var einfaldlega búinn að tæma vopnabúrið sitt eftir gríðarharða keppni við Gordon og því varð einfaldlega að finna eitthvað nýtt, sem tókst svo bærilega vel.
LaVine bætist þar með í hóp þeirra Michael Jordan, Nate Robinson og Jason Richardson sem unnið hafa keppnina tvisvar í röð.
Þriggja stiga keppnin leystist upp í einvígi milli tveggja samherja hjá meistaraliði Golden State Warriors, þeirra Klay Thompson og Stephen Curry. Sá síðarnefndi, sem af mörgum er talinn besti leikmaður deildarinnar, þótti sigurstranglegri en byssurnar voru kaldar í þetta skiptið og Thompson sigraði þetta árið.
Hér að neðan má sjá helstu tilþrifin í troðslukeppninni.
[youtube https://www.youtube.com/watch?v=YevA4a6U0Cc&w=560&h=315]