Peggy Knobloch hvarf sporlaust árið 2001 – Alræmdur nýnasisti grunaður um ódæðið
Hver urðu örlög hinnar níu ára gömlu Peggy Knobloch, sem hvarf sporlaust frá heimili sínu í Bæjaralandi? Þetta er spurning sem Þjóðverjar hafa spurt sig allt frá þeim örlagaríka degi í maí árið 2001.
Aðstandendur stúlkunnar, sem stundum var kölluð hin þýska Madeleine McCann, fengu ákveðin svör við spurningum sínum í sumar þegar líkamsleifar hennar fundust, 15 kílómetrum frá heimili hennar. Og í vikunni fengu aðstandendur enn frekari svör þegar DNA-rannsókn leiddi í ljós að alræmdur nýnasisti, Uwe Bönhardt, virðist hafa átt þátt í hvarfinu.
Hvarfið á Peggy vakti gríðarlega athygli á sínum tíma en hún sást síðast skammt frá heimili sínu í Lichtenberg í Bæjaralandi þann 7. maí 2001. Hundruð lögreglumanna tóku þátt í leitinni á sínum tíma og þyrlur sveimuðu yfir nágrenninu svo vikum skipti. Allt kom fyrir ekki – ekki fannst Peggy.
Það var ekki fyrr en í júlí í sumar að einhver svör fengust um örlög hennar. Maður sem var að tína matsveppi gekk þá fram á líkamsleifar og leiddi DNA-rannsókn í ljós að þarna væri komin fram Peggy Knobloch. Rannsókn lögreglu varð til þess að andlega vanheill maður, Ulvi Kulac, var dæmdur fyrir aðild að hvarfinu árið 2004 og dæmdur í lífstíðarfangelsi. Tæpum tíu árum síðar, eða árið 2014, var hann látinn laus eftir að áfrýjunardómstóll komst að þeirri niðurstöðu að fangelsisdómurinn hefði verið byggður á veikum grunni.
Eftir að líkamsleifarnar fundust í sumar fór rannsókn lögreglu á fullt aftur. Tekin voru DNA-sýni og þau send í rannsókn og þá komu tengslin við Uwe Bönhardt í ljós. Erfðaefnin fundust á fötum Peggy. Bönhardt var einn af liðsmönnum þýsku nýnasista- og hryðjuverkasamtakanna NSU (þ. Nationalsozialistischer Untergrund). Samtökin eru talin hafa staðið á bak við bankarán og morð á að minnsta kosti tíu manns árin 2002 til 2007; átta tyrkneskum innflytjendum, grískum ríkisborgara og þýskri lögreglukonu. Bönhardt og félagi hans úr samtökunum, Uwe Mundlos, frömdu sjálfsvíg árið 2011 eftir að hafa framið vopnað bankarán í borginni Eisenach.
NSU-samtökin komust einmitt í umræðuna í Þýskalandi í nóvember 2011 eftir að öflug sprenging varð í íbúðarhúsi í borginni Zwickau í austurhluta Þýskalands það ár. Nokkrum klukkustundum áður höfðu Bönhardt og Mundlos framið fyrrgreint rán, en þeir bjuggu í húsinu sem sprakk, ásamt Beate Zschäpe sem talin er að hafa sprengt húsið í loft upp. Beate, Bönhardt og Mundlos voru elskendur.
Í húsarústunum fundust meðal annars DVD-diskar þar sem ábyrgð var lýst á morðunum tíu og skotvopn sem notuð voru við morðin. Þá fannst dauðalisti með nöfnum 88 einstaklinga í Þýskalandi; stjórnmálamanna, þingmanna og fulltrúa tyrkneskra og íslamskra samtaka í Þýskalandi. Fjöldi nafna á listanum, 88, þykir þó ekki vera nein tilviljun. Talan er vinsæl meðal nýnasista en hún er eins konar stytting á orðtakinu „Heil Hitler“, en H er áttundi stafurinn í stafrófinu. Beate er nú fyrir dómi, ákærð fyrir aðild að morðunum árin 2002 til 2007.
Þýskir fjölmiðlar greindu frá því í vikunni að Beate væri reiðubúin að bera vitni um ódæðisverk Bönhardts gegn Peggy á sínum tíma. Ekki liggur fyrir hvers vegna Bönhardt nam stúlkuna á brott og myrti eins og margt bendir til. Fer lögregla nú meðal annars yfir tölvur sem Bönhardt notaðist við til að kanna hvort eitthvað komi fram sem varpað gæti betra ljósi á örlög stúlkunnar. Mathias Grasel, verjandi Beate, sagði við þýska fjölmiðla að skjólstæðingur sinn væri reiðubúinn að svara spurningum um hvarf stúlkunnar. Vitnaleiðslur fara fram í næstu viku.
