Ekki tókst að ná sátt í sjávarútvegsmálum
Ekkert verður af myndun fimm flokka ríkisstjórnar að svo stöddu og mun Birgitta Jónsdóttir, þingflokksformaður Pírata, skila umboði sem hún fékk til stjórnarmyndunar á dögunum. Ákveðið hefur verið að slíta viðræðum.
Birgitta segir í samtali við mbl.is að niðurstaðan sé vonbrigði. „En það er bara þannig að ef fólk treystir sér ekki til þess að fara það langt út fyrir þægindarammann er ekki hægt að þrýsta á að fólk sé að fara í samstarf án þess að hafa sannfæringu fyrir því að það sé að framfylgja þeim kosningaloforðum sem það var kosið á þing fyrir.“
Þá segir hún að helsta ástæða þess að upp úr slitnaði sé sú að ekki tókst að ná sátt um sjávarútvegsmál. Birgitta vill ekki útiloka að þeir fimm flokkar sem stóðu að viðræðunum geti myndað ríkisstjórn en nú sé réttast að láta annan fá boltann.