Minnihlutinn í borgarstjórn Reykjavíkur lagðist gegn því að götum yrði lokað í miðbænum meðan á Iceland Airwaves-hátíðinni stæði. Lögðu fulltrúar Sjálfstæðisflokks og Framsóknarflokksins fram breytingartillögu á fundi borgarráðs þar sem gert var ráð fyrir að götum yrði aðeins lokað eftir hefðbundinn lokunartíma verslana. Meirihlutinn hafnaði þeirri tillögu og vakti sú afgreiðsla mikla óánægju minnihlutans sem segir að um sáttatillögu hafi verið að ræða. „Hér er bara ein stefna og enginn vilji til að taka tillit til ólíkra hópa og hagsmuna í miðborginni.“

Tillagan, sem samþykkt var í dag, gerir ráð fyrir að Laugavegur, frá Vatnsstíg að mótum Bankastrætis og Þingholtsstrætis, og Skólavörðustígur, frá gatnamótum Bergstaðastrætis að Bankastræti, verði tímabundið gerð að göngugötusvæði dagana 2. til 6. nóvember 2016 vegna hátíðarinnar. Þar að auki verði Bankastræti lokað vegna opnunar Pönksafns Íslands þann 2. nóvember frá klukkan þrjú síðdegis til miðnættis.

Sem fyrr segir lögðust fulltrúar minnihlutans í borgarstjórn gegn þessu og töldu rétt að lokanir giltu aðeins eftir hefðbundinn afgreiðslutíma verslunar. Bókaði minnihlutinn að finna yrði takt í því að miðborgin gæti verið bæði menningarborg og borg verslunar- og viðskipta. Óviðunandi sé að helstu verslunargötum borgarinnar sé lokað án nokkurs fyrirsjáanleika.

Meirihlutinn benti hins vegar á að mikil ánægja hefði ríkt með sumarlokanir í miðborg Reykjavíkur. Þá hefði verið samþykkt í borgarkerfinu á síðasta ári að loka götum við sérstök tilefni og var Airwaves sérstaklega tilgreint í þeim efnum.