Klippt á ræðu Sigurðar Inga – Mistök, segir aðstoðarmaðurinn
Jóhannes Þór Skúlason, aðstoðarmaður Sigmundar Davíðs, segir það hafa verið mistök að stöðva útsendingu frá flokksþingi Framsóknarflokksins þegar Sigurður Ingi Jóhannsson forsætisráðherra tók til máls. Útsending var rofin fljótlega eftir að Sigmundur Davíð lauk máli sínu en hann flutti klukkustundarlanga ræðu. Sigurður Ingi fékk að tala í fimmtán mínútur og var að hefja sína ræðu þegar útsending var stöðvuð. Þetta kemur fram á RÚV.
Rauðglóandi símar hjá framsóknarmönnum
Á Eyjunni segir að mikil fagnaðarlæti hafi brotist út eftir ræðu Sigmundar og framsóknarmenn í sal blístrað og klappað. Þá sagði Sigmundur hvergi betra að búa enn á Íslandi og þakkaði flokksmönnum stuðning þegar ráðist hefði verið á fjölskyldu hans, líkt og hann orðaði það. Þá sagðist hann vera mannlegur og sæi eftir mistökum.
„Ég er ekki óumdeildur stjórnmálamaður og það verð ég líklega aldrei.“
Þá sagði Sigmundur að hann ætlaði sér að sameina flokksmenn ef honum yrði treyst fyrir formannshlutverkinu. Sigmundur lét vera að hjóla í Sigurð Inga en annað var upp á teningnum í ræðu forsætisráðherra sem klippt var á. Sigurður skaut föstum skotum á Sigmund í ræðu sinni sem varði eins og áður segir í 15 mínútur. Sagði Sigurður að það væri ekki í anda Framsóknarflokksins að Sigmundur fengi klukkustund en forsætisráðherra aðeins 15 mínútur.
Þá sagði Sigurður Ingi að menn þyrftu að líta í eigin barm og erfitt væri að endurheimta traust.
„Við þurfum að hafa flokk eða flokka sem vilja vinna með okkur. Hvernig er staðan í þeim efnum?
Klippt var á þessa ræðu Sigurðar og segir Jóhannes Þór í samtali við Rúv að það hafi verið mistök að gera slíkt á þessum tímapunkti.
„Þetta er mjög slæmt. Þetta hljóta hafa verið mistök og er afar slæmt. Mér þykir þetta mjög leiðinlegt. Það stóð til að allar ræðurnar yrðu sýndar. Það hefur eitthvað klikkað annað hvort í tækni eða á öðrum stað. Það hljóta að hafa verið vitlaus skilaboð til tæknimanna.“
Ekki náðist í Jóhannes Þór vegna málsins.
