Var lykilvitni í málum sérstaks saksóknara gegn stjórnendum Kaupþings – Bar ábyrgð á sölu á hlutum bankans í Símanum sem var gagnrýnd harðlega
Halldór Bjarkar Lúðvígsson, framkvæmdastjóri fjárfestingabankasviðs Arion banka, mun hætta störfum hjá bankanum á næstu dögum. Frá þessu er greint á visir.is en tilkynnt var um ákvörðunina núna í morgun.
Halldór Bjarkar hefur verið framkvæmdastjóri fjárfestingabankasviðs Arion banka frá því í september árið 2011 en þar áður var hann framkvæmdastjóri fyrirtækjaþjónustu hjá bankanum. Þá var Halldór Bjarkar viðskiptastjóri á útlánasviði bankans á árunum 2005 til 2008.
Sala Arion banka, sem var í umsjón fjárfestingabankasviðs bankans, á hlut í Símanum til annars vegar fjárfesta og stjórnenda í Símanum og hins vegar til vildarvina bankans í aðdraganda útboðs Símans síðastliðið haust var gagnrýnd harðlega. Var hluturinn seldur til fjárfestanna á mun lægra gengi en nam útboðsgengi Símans skömmu síðar.
Arion banki hefur viðurkennt að salan á 5% hlut í Símanum til vildarviðskiptavina bankans, skömmu fyrir hlutafjárútboð fjarskiptafyrirtækisins, hafi verið misráðin. Verklagi varðandi sölu á stærri eignarhlutum bankans í fyrirtækjum var í kjölfarið breytt. Bankinn hefur hins vegar hafnað því að óeðlilega hafi verið staðið að sölu á 5% hlut til fjárfestahóps sem var leiddur af Orra Haukssyni, forstjóra Símans, á genginu 2,5 en útboðsgengi Símans var hins vegar 3,33 krónur á hlut. Ekki hafi verið um að ræða „neinn afslátt“ í ljósi þess að fjárfestarnir mega ekki selja bréfin fyrr en í fyrsta lagi eftir átján mánuði.
Halldór Bjarkar hefur einnig verið lykilvitni í málum sérstaks saksóknara gegn helstu stjórnendum Kaupþings. Fram kom í niðurstöðu héraðsdóms Reykjavíkur fyrr í þessari viku í hinu svonefnda Chesterfield-máli að Halldór Bjarkar hefði verið óstöðugur í þeim skýrslum sem hann gaf í málinu. Hreiðar Már Sigurðsson, fyrrverandi forstjóri Kaupþings, Sigurður Einarsson, fyrrverandi stjórnarformaður bankans, og Magnús Guðmundsson, fyrrverandi bankastjóri Kaupþings í Lúxemborg, voru allir sýknaðir í málinu.
Við upphaf réttarhaldanna í Chesterfield-málinu sakaði Hreiðar Már Halldór Bjarkar um innherjasvik þegar hann seldi bréf sín í Kaupþingi og Exista nokkrum dögum fyrir fall bankans. Halldór Bjarkar hefur hafnað ásökunum um að hafa búið yfir innherjaupplýsingum þegar hann seldi bréf í Kaupþingi – hann segist aldrei hafa selt bréf í Exista – og jafnframt því að hann hafi breytt málflutningi sínum þegar hann gaf skýrslu í málinu.