Ung stúlka hefur stefnt íslenska ríkinu fyrir handtöku á Vesturlandi í ágúst í fyrra. Stúlkan var þá 16 ára og var leitað á henni án þess að haft væri samband við foreldra hennar eða barnaverndaryfirvöld.

Frá þessu er greint í Fréttablaðinu í dag en þar segir að stúlkan hafi verið látin afklæðast í fangaklefa á Akranesi ásamt annarri stúlku, sem einnig var undir lögaldri . Þar kemur fram að lögregluþjónn hafi skoðað kynfæri hennar og rass, án snertingar.

„Henni finnst að lögreglan eigi ekki að geta komist upp með svona án þess að neinn viti af því,“ segir Oddgeir Einarsson, lögmaður stúlkunnar.

Fram kemur að stúlkan var farþegi í bíl á leið frá Ólafsvík til Reykjavíkur ásamt öðrum ungmennum þegar lögregla á Vesturlandi stöðvar bílinn. Ungmennin voru öll handtekin og færð á lögreglustöðina á Akranesi þar sem leit var framin.

Stúlkan segir að í klefanum framkvæmdi lögregluþjónn líkamsleit á stúlkunni að hinni viðstaddri og var henni skipað að klæða sig úr öllum fötum. Stúlkan segist hafa hlýtt því og staðið nakin í fangaklefanum á meðan leitað var á henni. Fram kemur í fréttinni að ekki hafi verið haft samband við foreldra hennar né barnaverndaryfirvöld áður en leitin hófst.

„Lögmaður stúlkunnar hafði í kjölfarið samband við lögreglu til að fá upplýsingar um það hvers vegna stúlkan mátti þola þessa meðferð. Þegar óskað var eftir gögnum málsins kom í ljós að lögregluskýrsla var ekki skrifuð um atvikið fyrr en eftir að lögmaður hafði hringt og spurst fyrir um málið, eða 22 dögum eftir atvikið,“ segir í Fréttablaðinu.

Í skýrslu lögreglunnar segir að nafnlaus ábending um að fíkniefni hafi verið í bíl ungmennanna hafi verið ástæðan fyrir leitinni. Þá segir einnig að stúlkan hafi ekki verið látin afklæðast. Lögregluþjónn hafi þess í stað kíkt ofan í nærbuxur hennar við leitina.

Stúlkan segir það ekki rétt og segir að hún hafi verið látin fara úr öllum fötunum. Enn fremur segist hún ekki hafa verið í nærbuxum þetta kvöld.

„Við erum að fara í þetta mál því þetta lá mjög þungt á henni. Hún verður fyrir andlegu tjóni og vill fá staðfestingu á því að þetta hafi ekki verið rétt gert,“ segir Oddgeir og bætir við:

„En alveg sama þó maður taki allt sem þeir segja, þá stenst þetta engan veginn og er alveg út í hött. Það er umdeilt hvort það hafi verið kíkt ofan í nærbuxur eða hún látin afklæðast algjörlega. Hvort fyrir sig er náttúrulega alls ekki rétt aðferð.“

Ekki náðist í lögregluna á Vesturlandi en fram kemur að lögreglan hafi ekki fundið nein fíkniefni við leitina.