Lögreglan á Suðurnesjum hvetur til þess að bætt verði inn í frumvarp til nýrra heildarlaga um barnavernd ákvæðum um bann við internetnotkun barna við tilteknar alvarlegar aðstæður. Vísar embættið þar til mála sem varða alvarleg brot barna gegn öðrum börnum í gegnum netið og sömuleiðis til brota fullorðinna gegn börnum.
Karlmaður sem er aðeins 18 ára gamall hefur verið dæmdur í fangelsi í Svíþjóð fyrir tugi alvarlegra glæpa sem hann framdi á aldrinum 15-17 ára. Meðal þeirra voru morðtilraunir og kynferðisofbeldi. Glæpina framdi ungi maðurinn í gegnum netið og náðu þessi fólskuverk hans til nokkurs fjölda annarra landa, auk Svíþjóðar.
Til stendur í innviðaráðuneytinu að vinna að frumvarpi til breytinga á lögum um landshöfuðlénið „.is“. Einn hvatinn að þessari vinnu er að á undanförnum árum hafa komið upp þó nokkur tilfelli um að hér á landi séu skráðar vefsíður yfir starfsemi í vafasamari og oft á tíðum glæpsamlegri kantinum.
