Fyrstu laxar sumarins eru komnir á land í Selá í Álftafirði en áin hefur gefið sjö laxa og stærsti fiskurinn er 72 sentimetrar. En veiðin er að komast á fleygiferð þar þessa dagana.

,,Já, það eru komnir sjö laxar og það er gott vatn í ánni þessa dagana en mikið rok hérna,“  sögðu hressir veiðimenn við Selá í Álftafirði um helgina en allur laxinn hefur veiðst ofarlega í ánni.

,,Allir laxarnir eru lúsugir nema tveir sem voru silfurbjartir og ekki búnir að vera lengi í ánni. En Selá  hefur breytt sér mikið frá því í fyrra og þá sérstaklega neðri hluti árinnar. Þetta er allt á flugu enda ekkert annað leyft. Aðstæður eru erfiðar, hlífandi rok en flott vatn. Vindurinn kemur úr öllum áttum þessa stundina.  Þetta lýtur bara vel úr hérna með sumarið, laxinn er mættur og allt getur skeð,“  sögðu veiðimennirnir við Selá í Álftafirði um stöðuna.

Mynd. Eðvarð Atli Birgisson búinn að setja í maríulaxinn og landaði hún skömmu seinna í Selá í Álftafirði.