,,Rjúpnaveiðin gekk nú frekar rólega hjá okkur hér á norðaustur horninu. Lítið sást af fugli sérstaklega á Húsavíkursvæðinu og við Mývatn sem oft hafa verið bestu veiðisvæði landsins,“ segir Jón Ingi hjá Icelandic Hunting Adventures,  er við spurðum frétta af rjúpnaveiðinni þetta árið.

,,Auðvitað voru veiðimenn ánægðir með fjölgun veiðidaga og gátu þar að leiðandi valið daga þegar veðrið var gott og aðstæður góðar. Veðrið var mjög einsleitt nær allan mánuðinn. Nokkuð mikið frost, þannig að ís og hrím þöktu veiðilendur daga eftir dag, aðstæður sem rjúpan af einhverjum ástæðum vill ekki dvelja í,“ segir Jón Ingi.

Hann segir um leið og þiðnaði sást meira af fugli. Snjóalög voru þannig nær allan mánuðinn að rjúpan var mjög dreifð, snjór frá fjallsbrúnum og niður að sjó.

,,Það er mín skoðun og margra annarra hér fyrir norðan að lengja þyrfti veiðitímabilið, best væri að fá fleiri daga eins og t.d.í Noregi þar sem veitt er frá 15 október fram að jólum eða þá dreifa núverandi fjölda yfir lengra tímabil. Veiðimenn fengu þá fleiri tækifæri að veiða í mismunandi aðstæðum, t.d. kjarrveiði í snjó í desember eða október veiði eins og áður var og margir voru mjög hrifnir af,“sagði Jón Ingi ennfremur.

Mynd tekin af aðstæðum sem oft voru uppi í haust. Allt ísað og hrímað á veiðislóð, en fallegt