Maðurinn sem kom sér í heimsfréttirnar fyrir að kasta stól í höfuð vinar síns fyrir utan strippklúbb í Melbourne í Ástralíu er hátt settur stjórnandi hjá þekktum alþjóðlegum húsgagnaframleiðanda.

Myndband af atvikinu vakti gríðarlega athygli en á því mátti sjá þegar félagi mannsins steinrotaðist þegar hann fékk stólinn í höfuðið. Þeir félagar höfðu farið út á lífið en látið illa á umræddum klúbbi og sýnt af sér dónaskap við starfsfólk. Varð það til þess að dyraverðir vísuðu þeim út.

Annar mannanna sætti sig ekki við þetta, gekk inn á veitingastað við hliðina á strippklúbbnum og náði þar í stól sem hann ætlaði að kasta í dyraverðina. Það tókst ekki betur en svo að stólinn fór í hnakka félaga hans.

Ástralskir fjölmiðlar segja frá því að maðurinn sem kastaði stólnum heiti Tony Rogers og sé 58 ára sölustjóri hjá alþjóðlegum húsgagnaframleiðanda. Maðurinn sem var með honum mun vera þýskur og starfa í sama geira og var hann nýkominn frá Þýskalandi þegar Tony fór með hann út á lífið.

Talið er að maðurinn hafi sem betur fer náð sér fljótt og gengið af vettvangi án alvarlegra meiðsla.

Fjölmiðlar í Ástralíu greina frá því að Rogers verði að öllum líkindum sektaður fyrir óspektir og fyrir að neita að yfirgefa veitingastaðinn. Í kjölfar umfjöllunar fjölmiðla hefur hann eytt faglegum LinkedIn-aðgangi sínum og lokað persónulegum samfélagsmiðlasíðum. Þrátt fyrir ítrekaðar tilraunir blaðamanna hefur hann ekki veitt viðtöl.