Leikarinn og leikstjórinn Timothy Busfield, sem er þekktastur fyrir hlutverk sitt sem Danny Concannon í sjónvarpsþáttunum The West Wing, stendur frammi fyrir ákæru um kynferðislegt samneyti við ólögráða einstakling og barnaníð, samkvæmt handtökuskipun frá Nýju Mexíkó.

Busfield er sakaður um að hafa snert barn á óviðeigandi hátt á tökustað sjónvarpsþáttaraðarinnar The Cleaning Lady sem Busfield leikstýrði og lék í, samkvæmt kæru sem fréttamiðlar vestanhafs greina frá. Leikarinn stendur frammi fyrir tveimur ákærum um kynferðislegt samneyti við ólögráða einstakling og einni ákæru um barnaníð, samkvæmt handtökuskipun sem lögreglan í Albuquerque gaf út á föstudag.

Busfield neitaði ásökununum þegar rannsóknarmenn yfirheyrðu hann, segir í kærunni.

Samkvæmt dómsskjölum sögðu foreldrar drengsins að meint misnotkun hefði hafist árið 2022 þegar drengurinn var 7 ára gamalt.

Rannsóknin hófst í nóvember 2024, eftir að læknir á sjúkrahúsi Háskólans í Nýju Mexíkó skoðaði barnið og tilkynnti lögreglu um grun um kynferðislegt ofbeldi, samkvæmt kærunni.

Lögreglumaður tók viðtal við foreldra barnanna, sem sögðu rannsóknarmönnum að barnið og tvíburabróðir hans væru barnaleikarar. Börnin tilkynntu ekki um kynferðislegt ofbeldi á þeim tíma, samkvæmt kærunni.

Móðir drengsins tilkynnti síðar til barnaverndarnefndar að Busfield hefði beitt drenginn kynferðislegu ofbeldi frá nóvember 2022 til vorsins 2024.

Lögmenn Warner Bros., sem framleiðir The Cleaning Lady, sögðu lögreglu að þeir hefðu áður framkvæmt óháða rannsókn á ásökununum en sögðust ekki hafa fundið sannanir til að styðja ásakanirnar á þeim tíma.

Í yfirlýsingu sem talsmaður fyrirtækisins sendi miðlum vestanhafs sagði Warner Bros. Television: „Við tökum allar ásakanir um misferli mjög alvarlega og höfum kerfi til staðar til að rannsaka málið tafarlaust og ítarlega og, ef þörf krefur, grípa til viðeigandi aðgerða. Við erum meðvituð um núverandi ákærur gegn Busfield og höfum unnið með lögreglu og munum halda áfram að vinna með þeim.“

Busfield er giftur leikkonunni Melissu Gilbert, sem þekktust er fyrir hlutverk sitt sem Laura Ingalls í sjónvarpsþáttunum Húsið á sléttunni.

Ekki er vitað hvort Busfield sé í haldi lögreglu, og dómsgögn með upplýsingum um málskostnaðartryggingu og hvenær honum er gert að koma fyrir dóm eru ekki tiltæk. Yfirvöld sögðu að málið væri enn til rannsóknar.