Eigandi hússins er hinn 34 ára gamli Jonathan Christ Gerlach og er hann grunaður um að hafa brotist inn í að minnsta kosti 26 grafhvelfingar í yfirgefnum kirkjugarði í útjaðri borgarinnar frá því í byrjun nóvember. Jonathan var handtekinn á þriðjudag eftir rannsókn lögreglu.
Í frétt AP kemur fram að óskemmtileg sjón hafi mætt lögreglu þegar hún gerði húsleit á heimili hans, en í kjallaranum fundust um hundrað höfuðkúpur, rotnandi hendur og fætur og að minnsta kosti tvö heil lík sem höfðu varðveist ágætlega í grafhvelfingunum.
„Þetta var í ýmsu ástandi. Sumt hékk, ef svo má að orði komast. Sumt var sett saman, annað voru bara höfuðkúpur á hillu,“ segir Tanner Rouse saksóknari í málinu.
„Það má í raun segja að lögreglumenn hafi gengið inn í hryllingsmynd. Þetta var ótrúleg sjón,” segir Rouse í samtali við WPVI. Talið er að sumar líkamsleifarnar séu hátt í 200 ára gamlar en aðrar mun nýrri. Til marks um það sást gangráður á einu líkinu.
Kirkjugarðurinn sem um ræðir var stofnaður árið 1855 og er talið að þar séu um 150 þúsund grafir. Ekki er talið útilokað að Jonathan hafi athafnað sig í öðrum kirkjugörðum.
Jonathan var handtekinn eftir umfangsmikla rannsókn lögreglu, en í ljós kom að ákveðinn bíll hafði sést á eftirlitsmyndavélum nærri kirkjugarðinum á þeim tímum sem innbrotin áttu sér stað. Lögreglumenn gripu Jonathan glóðvolgan í vikunni þegar hann gekk aftur að bíl sínum með kúbein í hönd og poka sem innihélt líkamsleifar tveggja ungra barna og þrjár höfuðkúpur.
Rouse sagði við blaðamenn að ekki sé vitað hvað Jonathan gekk til með þessu, en hann situr í gæsluvarðhaldi og á yfir höfði sér fangelsisdóm vegna málsins.
