Daily Mail varpar ljósi á þennan dularfulla Þjóðverja sem heitir David Stern.
Stern, sem er 48 ára, er í gögnunum sagður hafa verið náinn aðstoðarmaður bæði Andrews og Epsteins og vísað meðal annars til Epsteins sem „yfirmanns“. Þá er hann sagður hafa gegnt hlutverki milligöngumanns í hundruðum skilaboða um hugsanleg viðskipti.
Lagði hann til að þeir settu á laggirnar fjárfestingaskrifstofu í Peking fyrir mjög efnaða einstaklinga og að ímynd Andrews sem hátt settur aðili innan bresku konungsfjölskyldunni myndi koma fyrirtækinu vel. Óljóst er hvort hugmyndin um umrædda fjárfestingaskrifstofu hafi orðið að veruleika.
Í skjölunum er einnig vísað til þess að Stern hafi árið 2013 verið falið að skipuleggja stefnumót fyrir Andrew með kvenkyns kunningja Epsteins sem var í heimsókn í London. Einnig kemur fram að hann hafi sent Epstein myndir og skilaboð sem tengdust afmælisóskum og persónulegum samskiptum.
Tveimur árum síðar virðist Stern hafa verið fenginn til að aðstoða kærustu Epsteins við dvöl í London. Í tölvupóstsamskiptum kemur fram beiðni um aðstoð við ferðalag hennar og vinkonu hennar, sem að öllum líkindum fól í sér heimsókn á opinbera staði, þar á meðal Buckingham-höll.
Gögnin gefa jafnframt til kynna að Stern hafi átt í reglulegum samskiptum við Söruh Ferguson, fyrrverandi eiginkonu Andrésar Bretaprins, og reynt að koma á samstarfi hennar við fyrirtæki sem rekur skemmtiferðaskip og hún hafi átt að gegna hlutverki eins konar kynningarfulltrúa.
Þá var hann skipaður stjórnarmaður í frumkvöðlaverkefni prinsins, Pitch@Palace, og kynntur fyrir Elísabetu drottningu II á opinberum viðburði.
Tölvupóstar sýna einnig að Stern hafi fylgt Andrési í opinberum viðskiptaerindum til Asíu og síðar hlotið sæti í stjórn góðgerðarsjóðs sem Filippus prins stofnaði. Stern hefur sem fyrr segir lítið látið fyrir sér fara en hann er talinn búa í Sameinuðu arabísku furstadæmunum.
