Parade skýrir frá þessu og bendir á að trefjar leggi sitt af mörkum til heilbrigðrar þarmaflóru, hjálpi til við að halda blóðfitunni í jafnvægi sem og blóðsykrinum. Þær geti líka hjálpað til við þyngdarstjórnun.
Ástæðan fyrir lítilli trefjaneyslu Bandaríkjamanna er að þeir borða einfaldlega ekki nóg af trefjaríkum mat á borð við ávexti, grænmeti, belgjurtir og gróft korn að sögn Charlotte Cervantes, lektors og yfirmanns næringarmála hjá Southeast Missouri State University.
Eins borða margir mjög mikið af ofurunnum kjötvörum að sögn Kerri Bewick, sérfræðilæknis og meltingarfærasérfræðings.
Það sem gerist ef nægra trefja er ekki neytt er að sögn Bewick eftirfarandi:
Hægðatregða – Hægðatregða er einn algengasti fylgifiskur lítillar trefjaneyslu. Trefjar hjálpa til við að koma hægðunum í gegnum þarmana fljótt og vel. Trefjaskortur gerir hægðirnar harðar og erfitt verður að koma þeim frá sér.
Krónísk hægðatregða getur valdið öðrum heilbrigðisvandamálum á borð við gyllinæð, endaþarmssprungum og ristilbólgu.
Þú finnur oftar fyrir hungri – Bewick sagði að trefjaneysla auki mettunartilfinninguna og hjálpi fólki að finnast það mett í langan tíma og það geti hjálpað til við að draga úr hitaeininganeyslu og við að hafa stjórn á þyngdinni.
Ef maður borðar ekki nóg af trefjum getur manni fundist maður svangur oftar. Það getur leitt til ofáts og aukinnar neyslu á óhollum mat.
Blóðfita og blóðsykur geta aukist – Trefjar hjálpa til við að lækka blóðsykurmagnið og ef trefjaneyslan er ekki nógu mikil getur blóðsykurmagnið aukist.
Trefjaríkur matur hefur einnig verið tengdur við lægri blóðþrýsting.
Trefjar draga úr upptöku glúkósa í þörmunum og koma þar með í veg fyrir hækkandi blóðsykurmagn. Ef maturinn inniheldur ekki nóg af trefjum getur það valdið auknu magni blóðsykurs og aukið líkurnar á sykursýki 2.
