Starfsmaður japönsku keisarafjölskyldunnar var nýlega rekinn úr starfi fyrir að hafa stolið 3,6 milljónum jena, sem svarar til um 3,2 milljóna króna, frá Naruhito keisara og fjölskyldu hans. Þjófnaðurinn átti sér stað á rúmlega eins árs tímabili.

Í tilkynningu frá hirðinni kemur fram að starfsmaðurinn sé á þrítugsaldri og hafi verið einn af um 80 starfsmönnum keisarafjölskyldunnar.

The Independent segir að komist hafi upp um starfsmanninn í mars þegar rannsókn hófst á misræmi á milli bókhalds og stöðu reiðufjár í peningaskáp fjölskyldunnar.

Í lok mars hurfu 30.000 jen úr peningaskápnum og þegar rætt var við fyrrgreindan starfsmann, sem hafði nýlokið næturvakt, játaði hann að hafa stolið peningunum. Sagðist hann eiga í fjárhagsvandræðum og þess vegna hafi hann stolið frá keisarafjölskyldunni. Hann játaði að hafa stolið 3,6 milljónum jena frá nóvember 2023 þar til í mars á þessu ári. Hann endurgreiddi peningana um miðjan apríl.

Þjófnaðurinn þykir mjög vandræðalegur fyrir hirðina en eitthvað þessu líkt hefur ekki gerst á síðari tímum.