Fimmtudaginn 8. maí slapp 18 ára stúlka úr prísund sem hún hafði dúsað í síðustu sjö árin. Það voru móðir hennar og stjúpfaðir sem höfðu haldið henni fanginni og meðal annars neytt hana til að búa í hundabúri í eitt ár.

Le Figaro skýrir frá þessu og segir að stúlkan hafi einnig verið beitt kynferðislegu ofbeldi. Búið er að handtaka móður hennar, hina 28 ára Brenda Spencer, og stjúpfaðir hennar, Branndon Mosley.

Grace MacAulay, saksóknari í Camden County í New Jersey, sagði á fréttamannafundi að stúlkan hefði verið neydd til að búa í hundabúri í um eitt ár og hafi henni bara verið hleypt öðru hvoru út úr því.

Hún var einnig hlekkjuð föst inni á baðherbergi og læst þar inni. Einnig var hún látin vera í herbergi, sem var útbúið hreyfiskynjurum, svo hún gæti ekki flúið.

Henni var öðru hvoru leyft að ganga frjáls um heimilið en bara þegar ættingjar komu í heimsókn. En 8. maí sá hún sér leik á borði og náði að flýja að heiman með aðstoð nágranna síns.

Í kjölfarið voru Brenda og Branndon handtekin. Þau eiga ákæru yfir höfði sér fyrir að hafa haldið stúlkunni fanginni og Branndon er einnig grunaður um að hafa beitt hana kynferðislegu ofbeldi.