Fyrrverandi eiginkona körfuboltagoðsagnarinnar Shaquille O’Neal gaf út endurminningar á síðasta ári sem vöktu töluverða athygli. Þar fjallaði hún um samband þeirra sem hófst á tíunda áratug síðustu aldar en lok svo árið 2009 eftir ítrekuð framhjáhöld körfuboltamannsins. Fyrrverandi eiginkonan, Shaunie Henderson, viðurkenndi að hún hafi notið tímans með O’Neal, en sambandið hafi verið dauðadæmt frá upphafi. Shaquille, sem er oftast kallaður Shaq, hafi haft eitt markmið ofar öllu, að verða ríkur og eftirsóttur. Shaunie segir að það hafi tekið hana langan tíma að horfast í augu við að hún elskaði ekki manninn sjálfan heldur hugmyndina um hann.

Degi eftir að endurminningarnar komu út brást Shaq við þessum ummælum fyrrverandi konu sinnar og gekkst við því að hafa ekki verið mannanna bestur.

„Ég skil þig, ég hefði ekki elskað mig heldur. Óska þér alls hins besta. Öll mín ást, Shaq.“

Shaq hefur opinberlega gengist við því að hafa verið Shauni ótrúr og gert mörg alvarleg mistök í hjónabandinu. Undanfarin ár hefur hann svo lagt hart að sér að halda ástarlífi sínu utan sviðsljóssins. Shaunie segir í bók sinni að það hafi verið léttir að Shaq gekkst við hegðun sinni opinberlega, það hafi veitt henni kjarkinn til að skrifa hispurslaust um hjónaband þeirra án ótta við viðbrögð aðdáenda hans.