Fyrir tveimur árum sömdu Kanadamenn um kaup á 88 F-35 orustuþotum frá bandaríska flugvélaframleiðandanum Lockheed Martin. Vélarnar kosta um 19 milljarða kanadískra dollara en það svarar til um 1.800 milljarða íslenskra króna.

Nú hefur Mark Carney, forsætisráðherra, beðið varnarmálaráðuneytið um að „leggja mat á“ hvort samningurinn sé góð fjárfesting og hvort það séu aðrir og betri möguleikar til að mæta þörfum Kanada.

Í tilkynningu frá ríkisstjórninni segir að í ljósi breyttra aðstæðna verði að tryggja að kaupsamningurinn þjóni hagsmunum Kanada og kanadíska flughersins.

Kanadamenn hafa nú þegar greitt fyrir 16 fyrstu vélarnar en þær á að afhenda á næsta ári.

Telja má líklegt að ástæðan fyrir þessum hugleiðingum Kanadamanna sé sú spenna sem ríkir í samskiptum landsins við nágrannana í Bandaríkjunum.