Stúlkan, Sudiksha Konanki, sást síðast aðfaranótt síðastliðins fimmtudags og hefur ekkert spurst til hennar síðan. Var hún í svokölluðu „vorfríi“ (e. spring break) með fimm vinkonum sínum í Punta Cana þegar hún hvarf.
Í frétt NBC News kemur fram að hún hafi síðast sést á ströndinni með ungum manni þar sem þau fengu sér meðal annars sundsprett í sjónum. Hún stuttu síða í göngutúr á ströndinni með þessum sama manni um klukkan þrjú aðfaranótt fimmtudags.
Þegar stúlkan var ekki í herberginu sínu að morgni fimmtudags tilkynntu vinkonur hennar um hvarfið og hafa yfirvöld í Dóminíska lýðveldinu meðal annars notið aðstoðar bandarískra og indverskra yfirvalda, en Konanki er indverskur ríkisborgari.
Í fréttum bandarískra fjölmiðla kemur fram að ungi maðurinn sem Konanki sást með hafi verið yfirheyrður, en ekki liggur fyrir hvort hann sé grunaður um aðild að hvarfi hennar.
Vinkonurnar áttu að fljúga heim á föstudag en ákváðu að vera lengur í Punta Cana vegna hvarfs Konanki. Yfirmaður lögreglu í Virginíuríki, sem aðstoða við rannsókn málsins, segir að ekki sé hægt að útiloka neitt varðandi hvarfið. Mögulega hafi verið um slys að ræða eða eitthvað saknæmt gerst. „Við útilokum ekkert,“ segir hann.
