Okkur hefur lengi verið sagt að matvæli, sem innihalda mikið af mettaðri fitu, til dæmis smjör, séu slæm fyrir heilsuna og að við eigum að takmarka mjög neyslu á slíkum matvælum.
Mettuð fita er ekki bara í smjöri því hún er til dæmis í rauðu kjöti, feitum mjólkurafurðum, kókosolíu, ís og bakkelsi.
Unilad segir að almennt sé fólki ráðlagt að takmarka hitaeininganeyslu dagsins við að aðeins 5 til 6% af þeim komi úr mettaðri fitu því rannsóknir hafi sýnt að neysla á mettaðri fitu auki líkurnar á sumum hjartasjúkdómum og heilablóðfalli. Neysla á mettaðri fitu er einnig talin tengjast þyngdaraukningu.
Ekberg vildi rannsaka þetta og sjá hvernig líkami hans myndi bregðast við meiri fituneyslu, sérstaklega smjörneyslu.
Á tíu dögum borðaði hann 100 matskeiðar af smjöri og er óhætt að segja að áhrif þessarar miklu smjörneyslu á líkamann hafi komið á óvart.
Fita var 78% af mataræði hans þessa tíu daga, prótín var 15% og kolvetni 7%.
Hann neytti átta sinnum meira af mettaðri fitu en fólki er ráðlagt.
Samkvæmt spálíkönum þá hefði þessi mikla fituneysla átt að hafa þau áhrif að þríglýseríð, sem er fitutegund sem er í blóðinu og er geymd í fitufrumum, myndi aukast mikið sem og insúlín ónæmi. Ekberg átti einnig að þyngjast við að borða svona mikið af fitu.
En honum til mikillar undrunar þá rættist þetta ekki.
Hann þyngdist ekkert á þessum tíu dögum. Hann stundaði ekki mikla hreyfingu, fór í nokkrar gönguferðir og gerði nokkrar armlyftur.
Glúkósamagnið mældist 95 í upphafi en var komið niður í 84 eftir tíu daga. Insúlínið fór niður í 2,8 úr 3,5. Miðað er við að insúlínmagnið sé á bilinu 2 til 5 hjá heilbrigðu fólki en hjá sykursýkisjúklingum er það oft á bilinu 25 til 30.
Hann segist ekki ráða fólki að borða svona mikið smjör en hafi einfaldlega viljað kanna hvað áhrif þetta hefði á sig.
