Hundruð Golden Retriever hunda mæta árlega í bæinn Downtown Golden í Colorado í Bandaríkjunum, ásamt eigendum sínum. Ástæðan er einföld, þar er haldin hátíð hundunum til heiðurs.

Hátíðin Goldens in Golden var fyrst haldin árið 2019 og hugsuð sem skemmtileg leið til að koma fólki og gæludýrum þeirra saman í smábænum yfir vetrartímann. Árið í ár var engin undantekning og fór hátíðin fram laugardaginn 8. febrúar.

Samkvæmt vefsíðu bæjarins var hátíðin sett á fót „til að hvetja til fleiri heimsókna í bæinn á rólegum vetrarmánuðum með því að bjóða Golden Retriever og eigendum þeirra að safnast saman undir Velkomin í Golden Arch boganum í bænum til heiðurs Alþjóðlega Golden Retriever deginum.“

„Þetta er yndisleg samkoma fólks og hunda og við elskum að fagna Alþjóðlega Golden Retriever deginum hér. Þessi viðburður gleður ekki bara samfélagið heldur kynnir fólk einnig Golden, bæ sem getur verið aðeins rólegur á þessum árstíma,“ segir Robin Fleischmann, skipulagsstjóri bæjarsins. Hann segir gestina einnig auka hagnað lítilla fyrirtækja í bænum.

Viðburðurinn stóð frá klukkan 11 til 13 að staðartíma, þar sem tvær hópmyndatökur voru skipulagðar svo allir gestir hefðu tækifæri til að vera með.

Gestirnir koma víða að eins og Eric og Pam Schorsch frá Tennessee. Hjónin fóru í ferðina til að halda upp á afmæli Pam með fjögurra mánaða hvolpinum sínum, sem var gjöf handa dóttur þeirra. „Við gátum ekki hugsað okkur betri leið til að fagna en með því að koma með nýja hvolpinn okkar hingað til Golden,“ segir Eric. „Það er ótrúlegt að sjá svona samfélag koma saman. Við höfum aldrei séð annað eins.“ 

Þátttakendur gátu keypt söfnunarvarning merktan viðburðinum, auk þess að mæta á marga viðburði eins og fyrirpartý Golden Mill með kokteilbar við varðeld og morgunverðarburrito.

Og þó að Goldens in Golden hafi verið sett á fót til að heiðra ákveðna hundategund segir á vefsíðu borgarinnar að „enginn sé að „skoða skilríki.“ Hins vegar eru „Aðeins leyfðir, þjálfaðir og vinalegir hundar.“