Í nóvember 2023 hringdi Morgan Alyson Creel í neyðarlínuna í Georgíuríki í Bandaríkjunum og tilkynnti að sex vikna sonur hennar væri meðvitundarlaus. Þegar viðbragðsaðilar komu á vettvang sagðist Creel hafa legið með syninum og hafi verið að reyna að hlýja honum með hárblásara en hafi sofnað.

Lögreglumenn beittu endurlífgunaraðferðum á drenginn, sem var með alvarleg brunasár á hægri hlið líkamans, en ekki tókst að bjarga lífi hans. Fox5 Atlanta skýrir frá þessu.

Í skýrslu lögreglunnar kemur fram að hún hafi fundið áhöld til maríjúananeyslu á svölunum.

Creel var handtekin daginn eftir vegna gruns um illa meðferð á barni og að hafa valdið annars stigs brunasárum á litla drengnum. Hún var síðar látin laus gegn greiðslu tryggingar.

Tæplega ári síðar var hún handtekin fyrir akstur undir áhrifum áfengis.

Fyrr í mánuðinum var hún ákærð fyrir að hafa myrt son sinn og er hún nú í haldi lögreglunnar.