Fjórir eru látnir, þar á meðal átta ára barn, og tíu slasaðir eftir skotárás í barnaafmæli í Kaliforníu á laugardag. Byssumaðurinn var enn ófundinn á sunnudagskvöld.

Lögregla fékk tilkynningu um árásina rétt fyrir klukkan 18 að staðartíma í veislusalnum Monkey Space í Stockton, skammt suður af Sacramento.

Þegar lögregla kom á vettvang voru fjórir látnir, en þeir voru 8, 14, 22 og 30 ára. Í hópi hinna slösuðu voru tvö börn, 9 og 15 ára.

Lögregla telur að ekki hafi verið um handahófskennda árás að ræða og byssumaðurinn hafi átt eitthvað sökótt við þá sem voru í umræddum veislusal.

Í gærkvöldi lágu ekki fyrir frekari upplýsingar um líðan hinna slösuðu.