Í umfjöllun BBC er aðgerðinni lýsr sem þeirri stærstu gegn farsímaþjófnuðum í sögu Bretlands og hafa nú þegar átján verið handteknir og hald lagt á yfir 2.000 stolin símtæki.
Að sögn lögreglu er jafnvel talið að hópurinn hafi staðið að flutningi á allt að helmingi allra farsíma sem stolið er í Lundúnum, þar sem meirihluti þjófnaða í Bretlandi á sér stað. BBC fékk að fylgjast með rannsókninni og aðgerðum lögreglu á 28 stöðum í Lundúnum og í Hertfordskíri.
Í umfjöllun BBC kemur fram að upphaf aðgerðarinnar megi rekja til einstaklings sem varð fyrir því að símanum hans var stolið. Á aðfangadagskvöld í fyrra tókst honum að rekja símann að vöruhúsi nálægt Heathrow-flugvelli.
„Öryggisverðir á vöruhúsinu voru allir af vilja gerðir til að hjálpa og fundu símann í kassa með 894 öðrum tækjum,“ sagði Mark Gavin, rannsóknarlögreglumaður hjá Lundúnalögreglunni.
Nánari rannsókn leiddi í ljós að flest tækin voru stolin og á leið til Hong Kong. Lögreglan beitti réttarrannsóknum til að rekja sendingarnar og voru í fyrstu tveir menn á þrítugsaldri handteknir, báðir afganskir ríkisborgarar. Þeir hafa verið ákærðir fyrir samsæri um að taka við stolnum munum og fyrir peningaþvætti.
Við handtöku fundust tugir síma í bifreið þeirra og voru margir þeirra vafðir inn í álpappír til að koma í veg fyrir að hægt væri að rekja þá. Þriðji maðurinn, 29 ára Indverji, hefur einnig verið ákærður fyrir sinn þátt.
„Fundurinn á fyrstu sendingunni var upphafið að rannsókn sem leiddi okkur að alþjóðlegum smyglhring sem við teljum bera ábyrgð á útflutningi allt að 40% allra stolinna síma í Lundúnum,“ segir Gavin við BBC.
Í síðustu viku voru síðan 15 manns til viðbótar handteknir sem grunaðir eru um aðild að glæpahringnum.
Þjófnaðarmálum þar sem farsímum er stolið hefur fjölgað mjög mikið í Lundúnum á undanförnum árum. Árið 2020 voru 28.609 slík mál tilkynnt en á síðasta ári voru málin 80.000. Um 75% allra farsímaþjófnaða í Bretlandi eiga sér stað í Lundúnum.
Sarah Jones, ráðherra lögreglumála í Bretlandi, segir að sumir glæpamenn hafi snúið baki við fíkniefnaviðskiptum og séu þess í stað farnir að stunda farsímaþjófnað markvisst.
„Ef þú stelur síma sem er hundruð punda virði, er auðvelt að skilja hvers vegna glæpamenn sækja í þetta,“ sagði hún.
Í umfjöllun BBC kemur fram að glæpahóparnir geri út mannskap sem fer um götur borgarinnar og stelur símum af fólki. Símarnir eru svo fluttir úr landi, oftar en ekki til Kína, þar sem þeir eru teknir í sundur eða endurstilltir. Þetta ferli gerir símana órekjanlega og virka þeir nánast eins og nýir.
