New York Post greinir frá því að Matthew hafi farið frá heimili sínu í Colorado Springs á öðrum degi jóla eftir að hafa rifist heiftarlega við eiginkonu sína vegna meints framhjáhalds hans. Þau áttu unga dóttur saman og er konan hans sögð hafa komist að framhjáhaldinu.
Eftir að hann yfirgaf Colorado er hann sagður hafa leigt Cybertruck-bifreiðina í gegnum appið Turo og haldið til Las Vegas. Þar lagði hann bifreiðinni fyrir framan Trump-hótelið og virkjaði sprengjur sem hann hafði útbúið áður en hann skaut sig.
Í fyrstu lék grunur á að málið tengdist voðaverkinu í New Orleans þar sem hryðjuverkamaður sem var hallur undir ISIS-samtökin ók á fjölda vegfarenda og hóf skothríð. Útilokar lögregla ekki að um persónulegan harmleik hafi verið að ræða.
Í frétt New York Post kemur fram að einnig hafi verið skoðað hvort tilviljun hafi ráðið því að hann valdi hótel í eigu Donalds Trump og bifreið sem framleidd er af dyggum stuðningsmanni hans, Elon Musk.
Fram kemur í umfjöllun Post að hann hafi þó verið stuðningsmaður Trumps.
Þá hefur lögregla sagt að hefði Matthew notað aðra bifreið en Cybertruck hefði tjónið líklega orðið meira. Elon Musk, stofnandi Tesla, sagði á X að Cybertruck-bifreiðin hefði dregið úr krafti sprengingarinnar og beint henni upp en ekki til hliðar. Sjö einstaklingar sem voru skammt frá bifreiðinni hlutu minniháttar meiðsl.
Matthew var bandarískur hermaður og gegndi meðal annars herþjónustu í Afganistan á árunum 2017 til 2018.
